2025 жылғы 5 қарашада Батыс Қазақстан облысы әкімдігі денсаулық сақтау басқармасының қарамағындағы «Теректі аудандық ауруханасы» ШЖҚ КМК-де мекеме ұжымымен кездесу өтті.

Кездесуге «SENIM» кәсіподағының төрағасы М.Қусаинов, филиалдың заңгері С.Саменова және Халықаралық құқықтық орталықтың кәсіби медиаторы Зауреш Шатикова қатысты.

Кездесу барысында ерекше назар медиатордың еңбек және әлеуметтік дауларды шешудегі рөліне аударылды. З.Шатикова еңбек ұжымындағы дауларды бейбіт жолмен реттеуге және қызметкерлер мен жұмыс беруші арасындағы өзара түсіністікті нығайтуға мүмкіндік беретін медиацияның тиімді құралы туралы баяндады.

Кездесу барысында еңбек қатынастары, әлеуметтік қамтамасыз ету және медицина қызметкерлерінің жұмыс жағдайлары талқыланды. Қызметкерлердің құқықтарын қорғау және еңбек дауларының алдын алу тетіктеріне ерекше мән берілді.

Іс-шара «Ашық есік күні» акциясы аясында өтті. Акция қызметкерлер мен кәсіподақ өкілдері арасында ашық диалог орнатуға бағытталған. Бұл шара медицина қызметкерлеріне өздерін толғандырған мәселелерді еркін көтеруге мүмкіндік береді және еңбек қатынастарында сенім мен әділдікті нығайтуға ықпал етеді.